شايب لبس بيجامة شعر ليبي شعبي

شايب يرقد في بجامه.. مايرقد في جلابيه

جوه في داره حمامه.. متمنقه ميه ف الميه

يلبس ع الموضه هندامه.. ولبساته ديمه رسميه

ومنظم ساعات طعامه.. وأغلب وجباته مشويه

روتيني داير نظامه.. يشرب قهوه كل عشيه

عندا فتره لنسيجامه.. عايش عيشه رومانسيه

كناري يغرد قدامه.. نغمت صوته موسيقيه

داير حوض أسماك أحجامه..يختلفن بألوان بهيه

شايب عاش دلال أيامه.. مافي عمره دار قضيه

مابين أوراقه وأقلامه.. مثقف و أفكاره حيه

فاندام إيتابع ف افلامه..و يحكي لغات أجنبيه

فارض ع الناس إحترامه.. واخذ لأمور إبجديه

هادي فى طبعه وكلامه.. مايعرفش العصبيه

مؤدب في رد سلامه.. تابع قول الله ونبيه

لاهو من ناس الجلهامه.. لاهو من ناس الحسديه

لاهو كيف أولاد عمامه.. قلت دين ومشكلجيه

لا يعرف زرع ولاجلامه.. لا يعرف عيت إم حويه

جاه إمراجع بو نجامه.. بن عمه من نفس الفيه

قاله راهو في خصامه .. في جيهت لأرض الفوقيه

فيها كانت فيه علامه.. لكن من مده مخفيه

هلي من عند الخرامه.. لاعند القاره لكصيه

من غربي وادي النعامه.. من شرقي مقلب لميه

من عند علاوي الحمامه.. لا عند قرارات هنيه

راهم جوها عيت سلامه.. ونحنا بتنا برانيه

يحكي ويقّبع فى أكمامه.. حردت سوريته ملويه

من ع الراس عزق لعمامه.. طلع من جيبه كميه

وخذت الأرض عليك ندامه.. ياعار العيله جمليه

نبوا يوم إيحيد غمامه.. نرجوا فيه الكبانيه

شال الشايب فى دوامه.. قاله فز أنعدو هيه

في التيوتا حط إخيامه.. هايلوكس أو فيها بتيه

خبزه وأشولات أقطامه.. و أجريوين أمعا عجميه

قبل الليل إيعم ظلامه.. وصلوا لأرض هللي مغزيه

كم واحت واتي بحزامه.. داير في جنبه غدريه

يبوا لزت عيت سلامه.. قبل الفجر إيعلم ضيه

تمه الشايب فى دوامه.. في الجيّه ماعنده نيه

تمت قدامه اتوامه..طلق إصناب و جطلاويه

ليله كي حلم الجثامه.. كم جثه تمت مرميه

ليله فيها عيت سلامه.. دالو لأرض إبعين قويه

خلوا عيلة بو نجامه.. يجاروا فى هالحطيه

لزوهم تمه إيتحامه.. شايبنا بالشماسيه

نين إغلب فى شيل أقدامه.. عارف روحه راح ضحيه

جاه واحد شين إنتقامه..قاسي ماعندا حنيه

متعضد يا فيه جهامه.. يقتل لو قوى بونيه

ضاع الشايب هو وأحلامه.. حصل دهكه في جوجيّه

طاح إيعيط من صمامه.. فاقد وعيه تم رميه

سبحانه ربي وأقسامه.. ماينجا لولا رعويه

لقيوه إيشير بأبهامه.. يطلب فى نجده فوريه

فى المستشفى كان إختامه.. مايوعى للي طرحيه

ما نجّين من الكسر إعضامه..دارولا كم عمليه

قررلا الطبيب إقامه.. لا جل شالو منا ريه

تبع رايات الهدامه.. غروا بيه إنسي ماضيه

إنـها أخ خـليفــة قـصيدة قـصصيـة رائـعة تخاطب واقعنا المـعاش ..

بحق أنها تحـمـل بين سطورها لفتة نظـر للإقلال من مثـل هذه التصرفات

التي قـد لا تـحـمد عـقـباها ، مثلـما حـدث لهذا الشايب المسكين ..

فتـحية صادقـة لـك ....

ملاحظــة : إن كانت القصيدة من عـندك أخي خليفة فأنقلها تحت عنوان

(( الشـعر العامي المنـغم الحـديث )) لأنها تعتبر ملكك وليست ملكا للشعب ..

وألف شكــر.. وأعـذرني على هذه الملاحظة ( لأن تخصصي في هذا المجال

هو الذي يـفرض علي التنبيه لذلك )) وعذرا مرة أخـرى..

وسلـم عـقـلك ويـداك ......

شكرا لك ياشاعرنا الكريم الاستاد منير وبارك الله فيك ولكن هده القصيدة ليست

من عندي بل نقلتها فقط اعجبتني فحبيت ان انقلها لكم .

وشكرا لك استادي الفاضل