طاحت شمس يا غالي غلاك ..
وخيّم ليل من فرقاك شين
يوم سعيد يا مسعد مساك ..
وفرحة عمر تمت بعد حين
ويا محلاه ضحكك يا بهاك ..
عليك يخيل لبيض والثمين
ادودش بث فالدنيا اضياك ..
وفوح بعطر ورد الياسمين
ها يا داي يا حالي معاك ..
هذا وين ما صدّق البين
قاطع فيه عرقي من نداك ..
وقالب فيه حالي مرفعين
ياللي كنت نفرح في زهاك ..
كنّي اليوم في فرحك حزين
وكيف تكون هي ساعة هناك ..
ساعة جرح في صدري مكين
وايش اليوم قالن لك ارياك ..
ووين القيت خاطيي قرين
واحد قبل راني وانت راك ..
كنا كيف تمينا اثنين
وكيف ازعمه تحكي عن هواك ..
لغيري فيه ليل النايمين
بنطق السان تهمس به شفاك ..
ولا بضحك عين المستكين
وكفك لان وارتخين عضاك ..
وكان لغير كفي ما يلين
وكيف اخطاي لطن عن اخطاك ..
ودربي وين ماشي وانت وين
سنين غلاي تعزقهن وراك ..
كيف اقدرت تقنى عزم زين
ووين تريد يا تابع هواك ..
عليك نخاف من غربه اسنين
بمن ع الدهر عابي في اعباك ..
ان صارت فيه تكشيرة جبين
يراعي فيك عينه من احذاك ..
ويشد اذراع للنشله متين
ويفهم فيه ما يجول بخفاك ..
ويقرا فيه في لمحة العين
ووين فرسان خيل يعرف وايش داك ..
وفيك يغوص للسر الدفين
اعياط البين ف الحلم ابدناك ..
قطع مشوار عمري قطعتين
مكبر نار من باقي رجاك ..
ان نافخ فيه ويثوب العوين
وايش يريد يضويهن بلاك ..
دروب الليل فالحال المهين
الحاصل كل مو ساير افداك ..
افداك الجرح و افداك الحنين
يا مشكاي لا تعكر صفاك ..
وزيد اليوم في ضحكك رنين
ادودش بس واسبح في افلاك ..
احلام البشر وابهج واستزين
اضحك للورد ما بين الاشواك ..
وارقص في قلوب العاشقين.
